ഹ്യൂസ്റ്റണ്‍ സെന്റ് മേരീസ് ക്‌നാനായ കത്തോലിക്കാ ഫൊറോനാ ദൈവാലയത്തില്‍ ഇടവകയുടെ പ്രധാന തിരുനാളിനുള്ള ആത്മീയ ഒരുക്കത്തിന്റെ ഭാഗമായി 40 മണിക്കൂര്‍ ദിവ്യകാരുണ്യ ആരാധന ഒക്ടോബര്‍ 2 വെള്ളിയാഴ്ച മുതല്‍ ഒക്ടോബര്‍ 4 ഞായറാഴ്ച വരെ നടത്തപ്പെടുന്നു.

ഒക്ടോബര്‍ 2 വെള്ളിയാഴ്ച രാവിലെ 9:00 മണിക്ക് വിശുദ്ധ കുര്‍ബാനയോടെയാണ് ദിവ്യകാരുണ്യ ആരാധന ആരംഭിക്കുന്നത്. തുടര്‍ന്ന് ഇടവകയിലെ വിവിധ കൂടാരയോഗങ്ങള്‍ക്ക് നിശ്ചയിച്ചിട്ടുള്ള സമയക്രമമനുസരിച്ച് രണ്ട് മണിക്കൂര്‍ വീതം ആരാധനയ്ക്ക് നേതൃത്വം നല്‍കും. എന്നാല്‍ നിശ്ചിത സമയങ്ങളില്‍ മാത്രമല്ല, ആരാധന നടക്കുന്ന എല്ലാ സമയങ്ങളിലും വിശ്വാസികള്‍ക്ക് വ്യക്തിപരമായും കുടുംബമായും എത്തി പ്രാര്‍ത്ഥിക്കാവുന്നതാണ്.

ഒക്ടോബര്‍ 4 ഞായറാഴ്ച രാവിലെ 7:30-നുള്ള വിശുദ്ധ കുര്‍ബാനയ്ക്കുശേഷം നടക്കുന്ന ദിവ്യകാരുണ്യ പ്രദക്ഷിണത്തോടെ 40 മണിക്കൂര്‍ ആരാധന സമാപിക്കും. കുട്ടികളെയും യുവജനങ്ങളെയും പ്രത്യേകമായി ഈ ദിവ്യകാരുണ്യ ഭക്തിയില്‍ പങ്കെടുപ്പിക്കണമെന്ന് ഇടവക വികാരി കുടുംബങ്ങളോട് അഭ്യര്‍ത്ഥിച്ചു.

കത്തോലിക്കാ സഭയുടെ പാരമ്പര്യത്തില്‍ ഏറെ പ്രാധാന്യമുള്ളതാണ് 40 മണിക്കൂര്‍ ദിവ്യകാരുണ്യ ആരാധന. യേശുക്രിസ്തുവിന്റെ യഥാര്‍ത്ഥ സാന്നിധ്യത്തിലുള്ള വിശ്വാസം ശക്തിപ്പെടുത്തുന്നതിനും വ്യക്തിപരമായ മാനസാന്തരത്തിനും കുടുംബങ്ങളുടെ വിശുദ്ധീകരണത്തിനും സഭയ്ക്കും ലോകത്തിനും വേണ്ടിയുള്ള പ്രാര്‍ത്ഥനയ്ക്കുമായി ഈ ഭക്താചരണം നടത്തപ്പെടുന്നു. ബൈബിളില്‍ 40 എന്ന സംഖ്യ പരീക്ഷണം, ശുദ്ധീകരണം, ഒരുക്കം, പുതിയ ദൗത്യത്തിലേക്കുള്ള പ്രവേശനം എന്നിവയുമായി ബന്ധപ്പെട്ട് ആവര്‍ത്തിച്ചു വരുന്ന ആത്മീയ പ്രതീകവുമാണ്.

ഈ വര്‍ഷത്തെ 40 മണിക്കൂര്‍ ആരാധനയ്ക്ക് പ്രത്യേക പ്രാധാന്യമുണ്ട്. ഒക്ടോബര്‍ 16 മുതല്‍ 18 വരെ നടക്കുന്ന ഇടവകയുടെ പ്രധാന തിരുനാള്‍ ആഘോഷങ്ങള്‍ക്ക് ആത്മീയ ഒരുക്കമായാണ് ഈ ദിവ്യകാരുണ്യ ആരാധന ക്രമീകരിച്ചിരിക്കുന്നത്. തിരുനാളിലേക്ക് പ്രവേശിക്കുന്നതിന് മുമ്പ് വ്യക്തികളും കുടുംബങ്ങളും പ്രാര്‍ത്ഥനയിലും മാനസാന്തരത്തിലും ദിവ്യകാരുണ്യ ഭക്തിയിലും ആഴപ്പെടുന്നതിനുള്ള അവസരമായി ഈ ദിവസങ്ങളെ ഉപയോഗിക്കണമെന്ന് ഇടവക വികാരി ഫാ. എബ്രഹാം മുത്തോലത്ത് ആഹ്വാനം ചെയ്തു.

ഇടവകാംഗങ്ങള്‍ മാത്രമല്ല, എല്ലാ വിശ്വാസികള്‍ക്കും 40 മണിക്കൂര്‍ ആരാധനയില്‍ പങ്കെടുത്ത് ദിവ്യകാരുണ്യനാഥന്റെ സന്നിധിയില്‍ പ്രാര്‍ത്ഥിക്കുവാന്‍ സ്വാഗതം ചെയ്യുന്നതായി സംഘാടകര്‍ അറിയിച്ചു.