ഡാളസ്: നോര്ത്ത് ടെക്സാസിലെ ക്നാനായ സമൂഹത്തിന്റെ സാംസ്കാരിക-സാമൂഹിക സംഘടനയായ ക്നാനായ കാത്തോലിക് അസോസിയേഷന് ഡാളസ് -ഫോര്ട്ട് വര്ത്തു് (KCADFW) 2026-ലെ വിദ്യാഭ്യാസ അവാര്ഡ് ജേതാക്കളെ പ്രഖ്യാപിച്ചു. അക്കാദമിക മികവ്, കഠിനാധ്വാനം, ഉന്നത വിദ്യാഭ്യാസത്തോടുള്ള പ്രതിബദ്ധത, കൂടാതെ ക്നാനായ സമൂഹത്തിലെ സജീവ പങ്കാളിത്തം എന്നിവയിലൂടെ ശ്രദ്ധേയരായ വിദ്യാര്ത്ഥികളെയാണ് ഈ വര്ഷം അവാര്ഡുകള്ക്കായി തെരഞ്ഞെടുത്തത്. അവരുടെ നേട്ടങ്ങള് മുഴുവന് ക്നാനായ സമൂഹത്തിനും അഭിമാനവും പ്രചോദനവും നല്കുന്നതാണെന്ന് കെ.സി.എ.ഡി.എഫ്.ഡബ്ല്യു എക്സിക്യൂട്ടീവ് കമ്മിറ്റി അറിയിച്ചു. ഈ വര്ഷത്തെ കെ.സി.എ.ഡി.എഫ്.ഡബ്ല്യു ആനാലില് എഞ്ചിനീയറിംഗ് എജുക്കേഷന് അവാര്ഡ് ജെയിംസിന്റെയും അനു കുളങ്ങരയുടെയും മകനായ മാത്യു കുളങ്ങരയ്ക്ക് ലഭിച്ചു. വിദ്യാഭ്യാസം, അച്ചടക്കം, ജീവിതകാല പഠനം എന്നിവയ്ക്ക് അതീവ പ്രാധാന്യം നല്കിയിരുന്ന എഞ്ചിനീയര്മാരായ പരേതരായ കുര്യാക്കോ (തമ്പി) ആനാലില് , ബിബി കെ. ആനാലില് എന്നിവരുടെ സ്മരണാര്ത്ഥമാണ് ഈ അവാര്ഡ് സ്ഥാപിച്ചിട്ടുള്ളത്. എഞ്ചിനീയറിംഗ് രംഗത്ത് മികവ് തെളിയിക്കുന്ന വിദ്യാര്ത്ഥികളെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് ഈ പുരസ്കാരം നല്കുന്നത്. രണ്ടായിരം ഡോളര് ആണ് അവാര്ഡ് മൂല്യം . അതേസമയം, കെ.സി.എ.ഡി.എഫ്.ഡബ്ല്യു 2026 വിദ്യാഭ്യാസ അവാര്ഡില് ഒന്നാം സ്ഥാനം നേടിയത് പാക്കാട്ടില് മാത്യുവിന്റെയും മായയുടെയും മകനായ അലന് മാത്യു പാക്കട്ടില് ആണ്. അലന് ടെക്സസ് എ & എം യൂണിവേഴ്സിറ്റിയില് കെമിക്കല് എഞ്ചിനീയറിംഗ് പഠനത്തിനായി പ്രവേശനം നേടിയിട്ടുണ്ട്. രണ്ടാം സ്ഥാനം ജോര്ജ് മാത്യൂസിന്റെയും സീമ മാത്യൂസ് അറക്കപ്പറമ്പിലിന്റെയും മകനായ ഇമ്മാനുവല് അറക്കപ്പറമ്പില് കരസ്ഥമാക്കി. ഇമ്മാനുവല്, യൂണിവേഴ്സിറ്റി ഓഫ് ടെക്സസ് അറ്റ് ഡാളസ് (UTD)-ല് ബിരുദ പഠനത്തിനായി ചേര്ക്കപ്പെടുകയാണ്. അവാര്ഡ് ജേതാക്കളെ അഭിനന്ദിച്ച കെ.സി.എ.ഡി.എഫ്.ഡബ്ല്യു പ്രസിഡന്റ് ബൈജു ആലപ്പാട്ട് സമൂഹത്തിലെ യുവതലമുറയുടെ വിദ്യാഭ്യാസ നേട്ടങ്ങള് അഭിമാനകരമാണെന്നും ഭാവിയിലും വിദ്യാര്ത്ഥികളെ പ്രോത്സാഹിപ്പിക്കുന്ന പദ്ധതികള് തുടരുമെന്നും അറിയിച്ചു. അവാര്ഡ് നിര്ണയ പ്രക്രിയ വിജയകരമായി പൂര്ത്തിയാക്കുന്നതില് നിര്ണായക പങ്കുവഹിച്ച കെ.സി.എ.ഡി.എഫ്.ഡബ്ല്യു വിദ്യാഭ്യാസ കമ്മിറ്റി അംഗങ്ങളായ എബി ആനാലില്, ടോം ചാക്കോ ചെന്നങ്ങാട്ട്, ആഷ് ലി തറയില് എന്നിവര്ക്കും എക്സിക്യൂട്ടീവ് കമ്മിറ്റി പ്രത്യേക നന്ദി രേഖപ്പെടുത്തി. വിദ്യാഭ്യാസ രംഗത്ത് മികച്ച നേട്ടങ്ങള് കൈവരിച്ച എല്ലാ ജേതാക്കള്ക്കും കെ.സി.എ.ഡി.എഫ്.ഡബ്ല്യുവിന്റെ ഹൃദയം നിറഞ്ഞ അഭിനന്ദനങ്ങളും ഭാവി ഉന്നത വിദ്യാഭ്യാസത്തിനു എല്ലാ ആശംസകളും നേര്ന്നു.