ഗോവ അയണ്‍മാന്‍ 70.3 ചലഞ്ചില്‍ മിന്നും നേട്ടവുമായി  ഡോ. അജയ് ജോസഫ്; മലയാളി താരങ്ങളില്‍ പ്രായവിഭാഗത്തില്‍ ഒന്നാമന്‍

ആറു മണിക്കൂര്‍ ഏഴ് മിനിറ്റില്‍ നീന്തലും സൈക്ലിങ്ങും ഓട്ടവും പൂര്‍ത്തിയാക്കി; അയണ്‍മാന്‍ 70.3 വിജയകരമായി പൂര്‍ത്തിയാക്കിയ ആദ്യ മലയാളി ന്യൂറോളജിസ്റ്റ്

ചേര്‍പ്പുങ്കല്‍: ആതുരസേവനരംഗത്തെ തിരക്കുകള്‍ക്കിടയിലും കഠിനമായ പരിശീലനത്തിലൂടെ കായികരംഗത്ത് ശ്രദ്ധേയ നേട്ടം കൈവരിച്ച് ക്‌നാനായക്കാരനായ ഡോ. അജയ് ജോസഫ്. നവംബര്‍ ഒന്നിന് ഗോവയില്‍ നടന്ന ലോകപ്രശസ്തമായ അയണ്‍മാന്‍ 70.3 ചലഞ്ച് ആറു മണിക്കൂര്‍ ഏഴ് മിനിറ്റില്‍ പൂര്‍ത്തിയാക്കിയ അദ്ദേഹം, മത്സരത്തില്‍ പങ്കെടുത്ത മലയാളി താരങ്ങളില്‍ സ്വന്തം പ്രായവിഭാഗത്തില്‍ ഒന്നാം സ്ഥാനം നേടി. അയണ്‍മാന്‍ 70.3 ചലഞ്ച് വിജയകരമായി പൂര്‍ത്തിയാക്കിയ ആദ്യ മലയാളി ന്യൂറോളജിസ്റ്റ് എന്ന നേട്ടവും ഡോ. അജയ് സ്വന്തമാക്കി.

തൊടുപുഴ മുതലക്കോടം ഹോളി ഫാമിലി ആശുപത്രിയില്‍ കണ്‍സള്‍ട്ടന്റ് ന്യൂറോളജിസ്റ്റായി സേവനമനുഷ്ഠിക്കുന്ന ഡോ. അജയ്, തിരക്കേറിയ ഔദ്യോഗിക ജീവിതത്തിനിടയിലും വര്‍ഷങ്ങളായി നടത്തിയ കഠിനപരിശീലനത്തിലൂടെയാണ് ഈ നേട്ടം കൈവരിച്ചത്. ജോലിത്തിരക്കുകള്‍ക്കിടയിലും മിക്ക ദിവസങ്ങളിലും പരിശീലനത്തിനായി സമയം കണ്ടെത്തിയ അദ്ദേഹം, ശാരീരികക്ഷമതയും മനക്കരുത്തും ഒരുപോലെ ആവശ്യപ്പെടുന്ന വെല്ലുവിളി വിജയകരമായി പൂര്‍ത്തിയാക്കുകയായിരുന്നു.

മൂന്ന് കായിക ഇനങ്ങള്‍, 113 കിലോമീറ്റര്‍ ദൂരം

സഹനശേഷിയുടെയും ആത്മസമര്‍പ്പണത്തിന്റെയും പരീക്ഷണമായ അയണ്‍മാന്‍ 70.3 മത്സരത്തില്‍ 1.9 കിലോമീറ്റര്‍ കടല്‍നീന്തല്‍, 90 കിലോമീറ്റര്‍ സൈക്ലിങ്, 21.1 കിലോമീറ്റര്‍ ഓട്ടം എന്നിവ തുടര്‍ച്ചയായി പൂര്‍ത്തിയാക്കണം. മൂന്ന് ഇനങ്ങളിലുമായി ആകെ 113 കിലോമീറ്റര്‍ ദൂരം ആറു മണിക്കൂര്‍ ഏഴ് മിനിറ്റില്‍ പിന്നിട്ടാണ് ഡോ. അജയ് ഫിനിഷിങ് ലൈന്‍ കടന്നത്.

അന്താരാഷ്ട്ര മത്സരവേദി

വിവിധ രാജ്യങ്ങളില്‍നിന്നുള്ള കായികതാരങ്ങള്‍ പങ്കെടുക്കുന്ന അന്താരാഷ്ട്ര മത്സരമാണ് ഗോവയില്‍ നടന്ന അയണ്‍മാന്‍ 70.3. മുപ്പതോളം രാജ്യങ്ങളില്‍നിന്നായി രണ്ടായിരത്തോളം മത്സരാര്‍ഥികള്‍ ഇത്തവണ പങ്കെടുത്തു.

ചേര്‍പ്പുങ്കല്‍ കല്ലൂര്‍ പള്ളി ഇടവകാംഗങ്ങളായ വടക്കേക്കുറ്റ് ജോസഫ് സാറിന്റെയും റിട്ടയേര്‍ഡ് പോസ്റ്റ് മാസ്റ്റര്‍ മേരി ജോസഫിന്റെയും മകനാണ് ഡോ. അജയ്. ചെറുകര ഇടവകാംഗവും പാലാ മുന്‍സിപ്പാലിറ്റി മുന്‍ ചെയര്‍മാന്‍ തോമസ് പീറ്ററിന്റെയും മുന്‍ കൗണ്‍സിലര്‍ സിബില്‍ തോമസിന്റെയും മകളുമായ ഡോ. ദിവ്യയാണ് ഭാര്യ. പാലാ കെയര്‍ ഡയഗ്‌നോസ്റ്റിക് സെന്ററില്‍ റേഡിയോളജിസ്റ്റായി സേവനമനുഷ്ഠിക്കുന്നു. മക്കള്‍ ഹസായേല്‍, കാലെബ്. സഹോദരന്‍ ഡോ. അരുണ്‍ കിടങ്ങൂരില്‍ പനാജിയ ഡെന്റല്‍ ക്ലിനിക് നടത്തുന്നു.

 

Previous Post

Amicizia 2k26 – ഏകദിന ക്യാമ്പ് സംഘടിപ്പിച്ചു

Total
0
Share
error: Content is protected !!