ഹൂസ്റ്റണ്‍: സെന്റ് മേരീസ് ക്‌നാനായ കത്തോലിക്കാ ഫൊറോനാ ദേവാലയത്തില്‍ പരിശുദ്ധ കന്യകാമറിയത്തിന്റെ ബഹുമാനാര്‍ഥം ഒക്ടോബര്‍ 16, 17, 18 തീയതികളില്‍ നടത്തിയ പ്രധാന തിരുനാള്‍ ഭക്തിനിര്‍ഭരമായ തിരുക്കര്‍മങ്ങളോടും വര്‍ണാഭമായ ആഘോഷങ്ങളോടും കൂടി സമാപിച്ചു. ഇടവകാംഗങ്ങളുടെ വിപുലമായ പങ്കാളിത്തവും യുവജനങ്ങളുടെ സജീവ സഹകരണവും തിരുനാളിനെ വിശ്വാസത്തിന്റെയും കൂട്ടായ്മയുടെയും അനുഭവമാക്കി മാറ്റി.
തിരുനാളിനു മുന്നോടിയായി നടന്ന നൊവേന, ജപമാല, ആരാധന, അനുരഞ്ജന ശുശ്രൂഷ എന്നിവ വിശ്വാസികളുടെ ആത്മീയ ഒരുക്കത്തിന് സഹായകമായി. തിരുനാള്‍ ദിവസങ്ങളിലെ വിശുദ്ധ കുര്‍ബാന, ലദീഞ്ഞ്, പ്രസംഗങ്ങള്‍, പ്രദക്ഷിണം എന്നിവയില്‍ നിരവധി വിശ്വാസികള്‍ പങ്കെടുത്തു. അനുകൂലമായ കാലാവസ്ഥയില്‍ നടന്ന ആഘോഷങ്ങള്‍ ഇടവകയുടെ ആത്മീയവും സാമൂഹികവുമായ ഉണര്‍വിന് വഴിയൊരുക്കി.
തിരുനാളിന്റെ ഒരുക്കങ്ങളിലും നടത്തിപ്പിലും യുവജനങ്ങള്‍ ശ്രദ്ധേയമായ പങ്കുവഹിച്ചു. വിവിധ സേവനമേഖലകളില്‍ ഉത്തരവാദിത്വത്തോടെ പ്രവര്‍ത്തിച്ച അവര്‍ തിരുക്കര്‍മങ്ങളുടെയും പ്രദക്ഷിണത്തിന്റെയും ക്രമീകരണങ്ങളിലും ആഘോഷപരിപാടികളിലും സജീവമായി സഹകരിച്ചു. മുതിര്‍ന്നവരോടൊപ്പം യുവജനങ്ങളും കുട്ടികളും കൈകോര്‍ത്തത് തലമുറകള്‍ തമ്മിലുള്ള ബന്ധവും ഇടവകയുടെ ഐക്യവും കൂടുതല്‍ ശക്തമാക്കി.
ഞായറാഴ്ച കമ്മ്യൂണിറ്റി സെന്ററില്‍ നടന്ന കലാവിനോദ പരിപാടികള്‍ തിരുനാളാഘോഷങ്ങള്‍ക്ക് മാറ്റുകൂട്ടി. കുട്ടികളും യുവജനങ്ങളും മറ്റു ഇടവകാംഗങ്ങളും അവതരിപ്പിച്ച വൈവിധ്യമാര്‍ന്ന കലാപരിപാടികള്‍ മികച്ച നിലവാരവും ആകര്‍ഷകമായ അവതരണവുംകൊണ്ട് ശ്രദ്ധ നേടി. കലാപ്രതിഭകള്‍ക്ക് വേദിയൊരുക്കിയ ഈ പരിപാടികള്‍ സദസ്സിന് ആസ്വാദനവും കുടുംബങ്ങള്‍ക്ക് സൗഹൃദം പങ്കിടാനുള്ള അവസരവും നല്‍കി. പരിപാടികളുടെ വിജയത്തിനായി പരിശീലനം നല്‍കിയവരുടെയും സംഘാടകരുടെയും അണിയറപ്രവര്‍ത്തകരുടെയും സേവനം പ്രശംസനീയമായി.
ഇടവകയിലെ ഏതാണ്ടെല്ലാ കുടുംബങ്ങളും 200 ഡോളര്‍ വീതം സംഭാവന നല്‍കി തിരുനാളിന്റെ പ്രസുദേന്തിമാരായി പങ്കുചേര്‍ന്നത് സമൂഹത്തിന്റെ ഐക്യത്തിന്റെയും പരിശുദ്ധ അമ്മയോടുള്ള ഭക്തിയുടെയും പ്രകടനമായി. തിരുനാളിന്റെ വിവിധ പ്രവര്‍ത്തനങ്ങള്‍ക്കായി സമയം, അധ്വാനം, സാമ്പത്തിക സഹായം എന്നിവ സമര്‍പ്പിച്ച സന്നദ്ധപ്രവര്‍ത്തകരുടെ കൂട്ടായ സേവനം ആഘോഷങ്ങളുടെ വിജയത്തില്‍ നിര്‍ണായകമായി.
തിരുനാള്‍ അനുഗ്രഹപ്രദമായി നടത്താന്‍ സാധിച്ചതിന് വികാരി ഫാ. ഏബ്രഹാം മുത്തോലത്ത് ദൈവത്തിന് നന്ദി അര്‍പ്പിച്ചു. സഹവികാരി ഫാ. ജോഷി വലിയവീട്ടില്‍, തിരുക്കര്‍മങ്ങളില്‍ പങ്കെടുത്ത വൈദികര്‍, കൈക്കാരന്മാര്‍, കമ്മിറ്റിയംഗങ്ങള്‍, ഗായകസംഘം, വിവിധ ഭക്തസംഘടനകള്‍, യുവജനങ്ങള്‍, കലാപരിപാടികളുടെ സംഘാടകര്‍, പ്രസുദേന്തിമാര്‍, എല്ലാ ഇടവകാംഗങ്ങള്‍ എന്നിവര്‍ക്കും അദ്ദേഹം നന്ദി അറിയിച്ചു. കൈക്കാരന്മാരായ സജി മരങ്ങാട്ടില്‍, ജെയിംസ് വടക്കേക്കര, സാബു കറുകപ്പറമ്പില്‍, നിധിന്‍ ജിജോ തോമസ് വട്ടമറ്റത്തില്‍, ഓഫീസ് സെക്രട്ടറി സിസ്റ്റര്‍ റെജി എസ്.ജെ.സി. ബിബി തെക്കനാട്ട്. എന്നിവര്‍ തിരുനാളിന്റെ ഒരുക്കങ്ങള്‍ക്ക് നേതൃത്വം നല്‍കി.
ബിബി തെക്കനാട്ട്
