ചിക്കാഗോ: സെന്റ് മേരീസ് ക്നാനായ കാത്തലിക് ചര്ച്ച് ചിക്കാഗോയിലെ ചെറുപുഷ്പ മിഷന് ലീഗ് യൂണിറ്റ് ഒരു വര്ഷമായി നടപ്പിലാക്കിയ ”സന്തോഷത്തോടെ പങ്കുവെക്കാം – കരുതലോടെ പ്രാര്ത്ഥിക്കാം” എന്ന ജന്മദിന കാരുണ്യപദ്ധതി സെപ്റ്റംബര് 20-ന് സമാപിച്ചു. ജന്മദിനാഘോഷങ്ങളെ മറ്റുള്ളവരുമായി സന്തോഷവും സ്നേഹവും പങ്കുവെക്കുന്നതിനുള്ള അവസരങ്ങളാക്കി മാറ്റുക എന്ന ലക്ഷ്യത്തോടെ നടപ്പിലാക്കിയ പദ്ധതിയിലൂടെ ഇന്ത്യയിലും ആഫ്രിക്കയിലുമായി 12 അര്ഹരായ സ്ഥാപനങ്ങള്ക്ക് സഹായം എത്തിക്കാനായി.
സെന്റ് മേരീസ് ദേവാലയത്തില് നടന്ന ഇംഗ്ലീഷ് വിശുദ്ധ കുര്ബാനയ്ക്കുശേഷം ഈ മാസം ജന്മദിനം ആഘോഷിക്കുന്നവര്ക്കായി ഇടവക വികാരി ഫാ. സിജു മുടക്കോടിയില് പ്രത്യേക ആശീര്വാദ പ്രാര്ത്ഥന നടത്തി. പുന്നത്തറ ബാലികാഭവനിലെ കുട്ടികളെയും പ്രാര്ത്ഥനയില് പ്രത്യേകം അനുസ്മരിച്ചു. തുടര്ന്ന് ചെറുപുഷ്പ മിഷന് ലീഗ് പ്രസിഡന്റ് ഐസക് മാത്താറ്റില് പദ്ധതിയുടെ ഒരു വര്ഷത്തെ പ്രവര്ത്തനങ്ങളും നേട്ടങ്ങളും പങ്കുവെച്ചു. ചെറുപുഷ്പ മിഷന് ലീഗ് ഡയറക്ടര് ജോജോ അനലില് പദ്ധതിയുടെ റിപ്പോര്ട്ട് ഇടവക വികാരി ഫാ. സിജു മുടക്കോടിലിനും ചെറുപുഷ്പ മിഷന് ലീഗ് ആത്മീയ ഡയറക്ടര് ഫാ. അനീഷ് മാവേലിപുത്തന്പുരയ്ക്കും കൈമാറി.
പദ്ധതിയുടെ വിജയകരമായ നടത്തിപ്പിനും സമര്പ്പിത സേവനത്തിനും ഇടവക വികാരി ഫാ. സിജു മുടക്കോടിയില് ജോജോ അനലിലിനെ അഭിനന്ദിച്ചു. തുടര്ന്ന് ഈ മാസം ജന്മദിനം ആഘോഷിക്കുന്നവര് ചേര്ന്ന് കേക്ക് മുറിച്ച് സന്തോഷം പങ്കുവെച്ചു. ചെറുപുഷ്പ മിഷന് ലീഗ് ജോയിന്റ് ട്രഷറര് ഡേവിഡ് കലപുരയ്ക്കല് മാതാപിതാക്കള്ക്കായി പദ്ധതിയുടെ സംഗ്രഹം അവതരിപ്പിച്ചു.
പദ്ധതിയുടെ അന്തിമ പരിപാടി കോട്ടയം പുന്നത്തറയിലെ മാര് മാക്കില് ബാലികാഭവനില് നടന്നു. സെന്റ് മേരീസ് ചിക്കാഗോയെ പ്രതിനിധീകരിച്ച് യൂത്ത് ട്രസ്റ്റി ഫെലിക്സ് പാലക്കന്, ഫിലിപ്പ് പുതന്പുര, ജോസ് ഞാറവേലില്, ബിജു പൂത്തറ, ജോജോ, മിനി എടകര, കുര്യാക്കോ പുറമഠത്തില് എന്നിവര് പങ്കെടുത്തു. ബാലികാഭവന് ഡയറക്ടര് സിസ്റ്റര് റോസ്മി എസ്.വി.എം. സ്വാഗതം ആശംസിച്ചു. ബാലികാഭവനിലെ കുട്ടികള് അവതരിപ്പിച്ച വിവിധ കലാപരിപാടികള് ചടങ്ങിന് മിഴിവേകി. സിസ്റ്റര് സില്വേറിയസ് എസ്.വി.എം.യും ഫെലിക്സ് പാലക്കനും ആശംസകള് നേര്ന്നു. തുടര്ന്ന് നടന്ന സ്നേഹവിരുന്നോടെ പരിപാടി സമാപിച്ചു.
ഒരു വര്ഷം നീണ്ട പദ്ധതിയിലൂടെ കുട്ടികളില് പങ്കുവെക്കല്, കരുണ, ദയ, ഉദാരത, നന്ദി തുടങ്ങിയ ജീവിതമൂല്യങ്ങള് വളര്ത്തിയെടുക്കാന് സാധിച്ചു. പദ്ധതിയോട് സഹകരിച്ച മാതാപിതാക്കള്, മതബോധന അധ്യാപകര്, മതബോധന വിഭാഗം അധ്യാപകര്, ചെറുപുഷ്പ മിഷന് ലീഗ് ഏകോപകര്, വൈദികര്, അഭ്യുദയകാംക്ഷികള് എന്നിവര്ക്ക് നന്ദി രേഖപ്പെടുത്തി. ഇടവകാംഗങ്ങളില്നിന്ന് ലഭിച്ച സംഭാവനകള് ഏകോപിപ്പിച്ച സിസ്റ്റര് ഷാലോമിനും പ്രത്യേക നന്ദി അറിയിച്ചു.
”വാങ്ങുന്നതിനെക്കാള് കൊടുക്കുന്നതിലാണ് അനുഗ്രഹം” എന്ന ബൈബിള് സന്ദേശം ഉയര്ത്തിപ്പിടിച്ച് സ്നേഹവും സന്തോഷവും പങ്കുവെച്ച ഒരു വര്ഷത്തെ കാരുണ്യപദ്ധതി സമാപിച്ചു.
