ഇന്ത്യയുടെ വിവിധ ഭാഗങ്ങളില്‍ മിഷണറി സേവനം അനുഷ്ഠിക്കുന്ന ക്‌നാനായ വൈദികരുടെയും സന്യാസിനികളുടെയും ആറാമത് ദ്വൈവാര്‍ഷിക മിഷണറി സംഗമം പഞ്ചാബിലെ ജലന്ധറില്‍ സമാപിച്ചു. ഓഗസ്റ്റ് 27, 28 തീയതികളില്‍ നടന്ന സംഗമത്തില്‍ പ്രാര്‍ത്ഥനയ്ക്കും സൗഹൃദ പങ്കുവെക്കലിനും മിഷന്‍ പ്രവര്‍ത്തനങ്ങളെക്കുറിച്ചുള്ള ചിന്തകള്‍ക്കുമായി 46-ഓളം പ്രതിനിധികള്‍ പങ്കെടുത്തു. ‘ക്രിസ്തുവില്‍ നവീകരിക്കപ്പെട്ട്, ദൗത്യത്തില്‍ ഒന്നുചേര്‍ന്ന്, ക്‌നാനായ പാരമ്പര്യത്തില്‍ വേരൂന്നി’ എന്ന പ്രമേയത്തില്‍ നടന്ന സംഗമത്തിന് ജലന്ധര്‍ രൂപതയില്‍ സേവനമനുഷ്ഠിക്കുന്ന ഫാ. പീറ്റര്‍ കാവുമ്പുറവും ക്‌നാനായ വൈദികരും ചേര്‍ന്ന് ആതിഥേയത്വം വഹിച്ചു. മിയാവോ രൂപതാധ്യക്ഷന്‍ മാര്‍ ജോര്‍ജ് പള്ളിപ്പറമ്പില്‍, കൊഹിമ രൂപതാധ്യക്ഷന്‍ ഡോ. ജെയിംസ് തോപ്പില്‍ എന്നിവര്‍ വിവിധ രൂപതകളെയും സന്യാസ സമൂഹങ്ങളെയും പ്രതിനിധീകരിച്ചെത്തിയ വൈദികര്‍ക്കും സന്യാസിനിമാര്‍ക്കുമൊപ്പം പങ്കെടുത്തു. ഓഗസ്റ്റ് 27-ന് ബിഷപ്പ് ജെയിംസ് തോപ്പിലിന്റെ മുഖ്യകാര്‍മ്മികത്വത്തില്‍ നടന്ന വിശുദ്ധ കുര്‍ബാനയോടെയാണ് പരിപാടികള്‍ക്ക് തുടക്കമായത്. തുടര്‍ന്ന് നടന്ന സൗഹൃദ സമ്മേളനത്തിന് ശേഷം, ഓഗസ്റ്റ് 28-ന് രാവിലെ ബിഷപ്പ് ജോര്‍ജ് പള്ളിപ്പറമ്പിലിന്റെ കാര്‍മ്മികത്വത്തില്‍ ദിവ്യബലി അര്‍പ്പിച്ചു. മിഷണറിമാര്‍ ആത്മീയ ജാഗ്രത പുലര്‍ത്തണമെന്നും തങ്ങളുടെ ദൈവവിളിക്ക് വിശ്വസ്തരായിരിക്കണമെന്നും ബിഷപ്പ് ജെയിംസ് തോപ്പില്‍ സന്ദേശത്തില്‍ ആഹ്വാനം ചെയ്തു. ഔദ്യോഗിക ഉദ്ഘാടന സമ്മേളനത്തില്‍ ഫാ. ഡോ. ജേക്കബ് ചാരളേല്‍ സ്വാഗതം ആശംസിച്ചു. ഫാ. സജിത്ത് സിറിയക് എസ്.എസ്.പി മാസ്റ്റര്‍ ഓഫ് സെറമണിയായി പ്രവര്‍ത്തിച്ചു.
ജലന്ധര്‍ രൂപതയുടെ ചരിത്രവും അജപാലന പ്രവര്‍ത്തനങ്ങളും ഫാ. സൈമണ്‍ കല്ലടയില്‍ പരിചയപ്പെടുത്തി. കഴിഞ്ഞ സംഗമത്തിന്റെ റിപ്പോര്‍ട്ട് ഫാ. ഷിബു അവതരിപ്പിച്ചു. ക്രിസ്തുവുമായുള്ള ജീവസ്സുറ്റ ബന്ധത്തില്‍ നിന്നാണ് മിഷണറി പ്രവര്‍ത്തനങ്ങള്‍ ഊര്‍ജ്ജം ഉള്‍ക്കൊള്ളുന്നതെന്ന് ബിഷപ്പ് ജോര്‍ജ് പള്ളിപ്പറമ്പില്‍ ചൂണ്ടിക്കാട്ടി. കോട്ടയം അതിരൂപതയ്ക്കും നിയുക്ത സഹായ മെത്രാന്‍ മാര്‍ തോമസ് ആനിമൂട്ടിലിനും വേണ്ടിയുള്ള പ്രാര്‍ത്ഥനാപൂര്‍വ്വമായ ഐക്യദാര്‍ഢ്യം ഇരു മെത്രാന്മാരും യോഗത്തില്‍ പങ്കുവെച്ചു. വിവിധ മിഷന്‍ മേഖലകളിലെ അനുഭവങ്ങള്‍ പങ്കുവെച്ച സെഷനുകളില്‍ മിഷണറിമാര്‍ തങ്ങളുടെ നേട്ടങ്ങളും വെല്ലുവിളികളും മാറുന്ന സാഹചര്യങ്ങളും അവതരിപ്പിച്ചു.
ടൂറയില്‍ നിന്നുള്ള ഫാ. സണ്ണി, കര്‍ഷകരുടെ ക്ഷേമത്തിനായും കാര്‍ഷിക വികസനത്തിനായും സര്‍ക്കാര്‍ ഏജന്‍സികളുമായി സഹകരിച്ച് നടത്തുന്ന പ്രവര്‍ത്തനങ്ങളെക്കുറിച്ച് സംസാരിച്ചു. ജലന്ധര്‍, മിയാവോ, ബിജ്‌നോര്‍ എന്നിവിടങ്ങളില്‍ നിന്നുള്ള ഇടയദൗത്യ അനുഭവങ്ങളും യോഗത്തില്‍ ചര്‍ച്ചയായി. മറ്റ് മിഷന്‍ മേഖലകളില്‍ പ്രായോഗികമാക്കാന്‍ കഴിയുന്ന നൂതന ആശയങ്ങളും പങ്കുവെക്കപ്പെട്ടു. പരസ്പര സഹായം ശക്തിപ്പെടുത്തുന്നതിനുള്ള സുപ്രധാന തീരുമാനങ്ങള്‍ പൊതുചര്‍ച്ചയില്‍ രൂപപ്പെട്ടു. അന്തരിക്കുന്ന മിഷണറിമാരുടെയും അവരുടെ അടുത്ത കുടുംബാംഗങ്ങളുടെയും സംസ്‌കാരച്ചടങ്ങുകളില്‍ മിഷണറി ഫ്രാറ്റേണിറ്റിയുടെ പ്രതിനിധികള്‍ പങ്കെടുക്കുന്ന രീതി പുനരാരംഭിക്കാന്‍ തീരുമാനമായി. വിരമിച്ച മിഷണറിമാരുടെ പരിപാലനം, താമസം എന്നിവയും ചര്‍ച്ച ചെയ്തു. ഇവയുടെ ഭരണപരമായ നടത്തിപ്പും സാമ്പത്തിക ഭദ്രതയും സംബന്ധിച്ച് തുടര്‍ചര്‍ച്ചകള്‍ നടക്കും. ക്‌നാനായ മിഷണറി ഡയറക്ടറിയുടെ രണ്ടാം പതിപ്പ് തയ്യാറാക്കാന്‍ ഫാ. സജിത്ത് സിറിയക് എസ്.എസ്.പി-യെ ചുമതലപ്പെടുത്തി. ആദ്യ പതിപ്പ് തയ്യാറാക്കിയ ഫാ. ജെയ്‌സ് ജോസ് ആശാരിപറമ്പില്‍ , ഫാ. ഷിബു മണലേല്‍ എന്നിവര്‍ ഇദ്ദേഹത്തെ സഹായിക്കും. ഡയറക്ടറി നിലവില്‍ വരുന്നത് മിഷണറിമാര്‍ തമ്മിലുള്ള ആശയവിനിമയവും സഹകരണവും കൂടുതല്‍ ശക്തമാക്കും. വരും സംഗമങ്ങളില്‍ പരിശീലന സെഷനുകള്‍ ഉള്‍പ്പെടുത്താനും, സംഘാടനച്ചെലവുകള്‍ സംയുക്തമായി വഹിക്കാനും ധാരണയായി. അടുത്ത ദ്വൈവാര്‍ഷിക സംഗമം 2028 ഓഗസ്റ്റില്‍ ആഗ്ര-ഡല്‍ഹി മേഖലയില്‍ വെച്ച് നടത്തപ്പെടും. അന്താരാഷ്ട്ര കറ്റക്കേറ്റിക്കല്‍ കൗണ്‍സിലിലേക്ക് പുനര്‍നിയമനം ലഭിച്ച ബിഷപ്പ് ജോര്‍ജ് പള്ളിപ്പറമ്പിലിനെ യോഗത്തില്‍ ആദരിച്ചു. പൗരോഹിത്യ രജതജൂബിലി ആഘോഷിക്കുന്ന ഫാ. പീറ്റര്‍ കാവുമ്പുറം, ഫാ. ബിജു കൂട്ടക്കൈതയില്‍, ഫാ. വിനോയ് പുളിവേലില്‍ എന്നിവര്‍ക്കും, സിഎച്ച്എഫ് പഞ്ചാബ് പ്രൊവിന്‍ഷ്യല്‍ സിസ്റ്റര്‍ സുജയ്ക്കും ചടങ്ങില്‍ ആദരവ് നല്‍കി.
ക്‌നാനായ മിഷണറീസ് സെക്രട്ടറി ഫാ. ഷിബു മണലേല്‍ നന്ദി രേഖപ്പെടുത്തി. ലവ്ലി പ്രൊഫഷണല്‍ യൂണിവേഴ്‌സിറ്റി, അമൃതസര്‍, ഷിംല എന്നിവിടങ്ങളിലേക്കുള്ള സന്ദര്‍ശനവും സൗഹൃദ വിരുന്നുകളും അംഗങ്ങള്‍ക്ക് പരസ്പരം കൂടുതല്‍ അടുക്കാന്‍ അവസരമൊരുക്കി. മിഷന്‍ സേവനത്തിലും സാഹോദര്യത്തിലും കൂടുതല്‍ ശക്തമായി മുന്നോട്ടുപോകുമെന്ന പ്രഖ്യാപനത്തോടെയാണ് സംഗമം അവസാനിച്ചത്.