ഹൂസ്റ്റണ്: ഹൂസ്റ്റണ് സെന്റ് മേരീസ് ക്നാനായ കത്തോലിക്കാ ഫൊറോനാ പള്ളിയില് പരിശുദ്ധ ദൈവമാതാവിന്റെ സ്വര്ഗ്ഗാരോപണ തിരുനാള് ഭക്തിനിര്ഭരമായി ആഘോഷിച്ചു. ഓഗസ്റ്റ് 9 ഞായറാഴ്ച രാവിലെ 7:30-ന് ആരംഭിച്ച തിരുനാള് തിരുക്കര്മ്മങ്ങള്ക്ക് ഇന്ത്യയില് മിയാവു രൂപതയുടെ മെത്രാന് മാര് ജോര്ജ്ജ് പള്ളിപ്പറമ്പില് മുഖ്യകാര്മ്മികത്വം വഹിച്ചു.
വിശുദ്ധ കുര്ബാന മധ്യേ നല്കിയ സന്ദേശത്തില്, ക്രൈസ്തവ ജീവിതത്തിലും തിരുസഭയുടെ വളര്ച്ചയിലും പരിശുദ്ധ ദൈവമാതാവിനുള്ള പ്രത്യേക പങ്കിനെക്കുറിച്ച് ബിഷപ്പ് അനുസ്മരിച്ചു. മാതാവിന്റെ മാതൃകയും മധ്യസ്ഥതയും ദൈനംദിന ജീവിതത്തില് വലിയ വഴികാട്ടിയാണെന്ന് അദ്ദേഹം ഓര്മ്മിപ്പിച്ചു.
വിശുദ്ധ കുര്ബാനയ്ക്ക് ശേഷം, ദേവാലയത്തിന് പിന്വശത്തായി നിര്മ്മിക്കുന്ന പുതിയ സണ്ഡേ സ്കൂള് മന്ദിരമായ ‘ഹൊറൈസണ് സെന്ററി’ന്റെ ഗ്രൗണ്ട് ബ്രേക്കിംഗ് കര്മ്മം ബിഷപ്പ് മാര് ജോര്ജ്ജ് പള്ളിപ്പറമ്പില് മുഖ്യ അതിഥിയായി നിര്വ്വഹിച്ചു.
വിശുദ്ധ കുര്ബാനയിലും അനുബന്ധ ചടങ്ങുകളിലും വികാരി ഫാ. അബ്രഹാം മുത്തോലത്ത്, അസിസ്റ്റന്റ് വികാരി ഫാ. ജോഷി വലിയവീട്ടില് എന്നിവര് സഹകാര്മ്മികരായിരുന്നു.
കൈക്കാരന്മാരായ സാജി മരങ്ങാട്ടില്, ജെയിംസ് വടക്കേക്കര, സാബു കറുകപ്പറമ്പില്, നിഥിന് വട്ടമറ്റത്തില്, സിസ്റ്റര് റെജി SJC, ബിബി തെക്കനാട്ട് എന്നിവരുടെ നേതൃത്വത്തിലാണ് തിരുനാള് ആഘോഷങ്ങളും ശിലാസ്ഥാപന ചടങ്ങുകളും സംഘടിപ്പിച്ചത്. ആഘോഷങ്ങളില് നിരവധി ഇടവകാംഗങ്ങള് പങ്കെടുത്തു.
