ന്യൂയോര്‍ക് : ലോങ് ഐലന്‍ഡ് ക്‌നാനായ കത്തോലിക്കാ ഫൊറോനാ പള്ളിയിലെ ഇടവക മധ്യസ്ഥനായ വിശുദ്ധ എസ്തപ്പാനോസ് സഹദായുടെ തിരുന്നാള്‍ മെയ് 17, 18, 19 തീയതികളില്‍ ആഘോഷിക്കുന്നു. തിരുന്നാള്‍ തിരുകര്‍മ്മങ്ങളില്‍ സംബന്ധിക്കുവാനും വിശുദ്ധന്‌ന്റെ അനുഗ്രഹം പ്രാപിക്കുവാനും ഏവരെയും സ്‌നേഹപൂര്‍വ്വം ക്ഷണിച്ചുകൊള്ളുന്നു.
മെയ് 17 വെള്ളിയാഴ്ച തിരുനാളിനു തുടക്കം കുറിച്ചുകൊണ്ട് വൈകുന്നേരം 7:30ന് ഇടവക വികാരി ഫാ. മാത്യു മേലേടത്തിന്റെ നേതൃത്വത്തില്‍ കൊടിയേറ്റ് നടത്തപ്പെടും. തുടര്‍ന്ന് ലദീഞ്ഞും, നൊവേനക്കും ശേഷം മരിച്ചവരെ അനുസ്മരിച്ചുകൊണ്ടുള്ള വിശുദ്ധ കുര്‍ബാന അര്‍പ്പിക്കുന്നതാണ്.
മെയ് 18 ശനിയാഴ്ച വൈകുന്നേരം 5 മണിക്ക് ഫാ. ലിജോ കൊച്ചുപുരക്കലിന്റെ (വികാരി, ക്രൈസ്റ്റ് ദ കിംഗ് ക്‌നാനായ കത്തോലിക്കാ ദേവാലയം, ന്യൂ ജേഴ്‌സി) കാര്‍മികത്വത്തില്‍ ലദീഞ്ഞും വിശുദ്ധ കുര്‍ബാനയും നടത്തപ്പെടും. തദവസരത്തില്‍ ഫാ. ജോബി വെള്ളൂകുന്നേല്‍ (അസിസ്റ്റന്റ് വികാരി സെന്റ് മേരിസ് സീറോ മലബാര്‍ കത്തോലിക്ക ദേവാലയം ബെത്‌പേജ്) തിരുന്നാള്‍ സന്ദേശം നല്‍കുന്നതാണ്. തുടര്‍ന്ന് സ്നേഹവിരുന്നും ഇടവകയിലെ കൂടാര യോഗങ്ങള്‍ അവതരിപ്പിക്കുന്ന കലാസന്ധ്യയും ഉണ്ടായിരിക്കുന്നതാണ്.
മെയ് 19 ഞായറാഴ്ച രാവിലെ 10:30ന് ഫാ. ജിജോ നെല്ലിക്കകണ്ടത്തിന്റെ (പ്രൊഫസര്‍ – സെന്റ് ജോസഫ് പോണ്ടിഫിക്കല്‍ മേജര്‍ സെമിനാരി മംഗലപ്പുഴ) പ്രധാന കാര്‍മികത്വത്തില്‍ ആഘോഷമായ തിരുന്നാള്‍ കുര്‍ബാന നടത്തപ്പെടും.
തുടര്‍ന്നു ലോങ് ഐലന്‍ഡ് താളലയം അവതരിപ്പിക്കുന്ന വാദ്യഘോഷ ചെണ്ട മേളത്തോടുകൂടി പ്രൗഢഗംഭീരമായ തിരുന്നാള്‍ പ്രദിക്ഷണം. അതിനുശേഷം സ്നേഹവിരുന്നും കുട്ടികള്‍ക്കും മുതിര്‍ന്നവര്‍ക്കും ഒരുപോലെ ആസ്വദിക്കുവാന്‍ പള്ളിയങ്കണത്തില്‍ വിവിധ മിനിസ്ട്രികളുടെ മേല്‍നോട്ടത്തില്‍ കാര്‍ണിവലും ഉണ്ടായിരിക്കുന്നതാണ്. വിശുദ്ധ എസ്തപ്പാനോസ് സഹദായുടെ കല്ലും തൂവാലയും എഴുന്നള്ളിക്കുവാനുള്ള സൗകര്യം വെള്ളി, ശനി, ഞായര്‍ ദിവസങ്ങളില്‍ സജ്ജീകരിക്കുന്നതാണ്.
ഈ വര്‍ഷത്തെ തിരുന്നാള്‍ നടത്തുവാന്‍ സ്‌പോണ്‍സര്‍ ചെയ്തിരിക്കുന്നത് സ്റ്റീഫന്‍ & ലൗലി പുതുപ്പള്ളിമ്യാലില്‍ കുടുംബമാണ്. ഇടവക തിരുന്നാള്‍ ഏറ്റം ഭക്തി നിര്‍ഭരവും ആഘോഷപ്രദവുമാക്കുവാന്‍ ഇടവക വികാരി ഫാ. മാത്യു മേലേടത്ത്, കൈക്കാരന്മാരായ അനി നെടുംതുരുത്തില്‍, എബ്രഹാം നെടുംതൊട്ടിയില്‍, ജെയിംസ് നികര്‍ത്തില്‍, മാത്യു ഇഞ്ചനാട്ട്, സാക്രിസ്റ്റി ജോമോന്‍ ചിലമ്പത് എന്നിവരുടെ നേതൃത്വത്തില്‍ എല്ലാ ഒരുക്കങ്ങളും പുരോഗമിക്കുന്നു.
അനൂപ് മുകളേല്‍ (പി.ര്‍.ഓ.)
