സാന്‍ ഹൊസെ , കാലിഫോര്‍ണിയ : നിങ്ങള്‍ ലോകമെങ്ങും പോയി സുവിശേഷം പ്രസംഗിക്കുവിന്‍ എന്ന യേശുവിന്റെ വചനത്തെ അനുസ്മരിച്ചുകൊണ്ട് സെന്റ് മേരീസ് ക്നാനായ കാത്തലിക് ക്നാനായ ദേവാലയത്തില്‍ ചെറുപുഷ്പ മിഷന്‍ ലീഗിന്റെ നേതൃത്വത്തില്‍ നവംബര്‍ 17 ഞായറാഴ്ച മിഷന്‍ ദിനം ആചരിച്ചു . വികാരി ഫാ : ജെമി പുതുശ്ശേരിയുടെ നേതൃത്വത്തില്‍ നടത്തപെട്ട കുര്‍ബാന മദ്ധ്യേ പ്രത്യേകമായി പ്രാര്‍ത്ഥിക്കുകയും ശേഷം ഹാളില്‍ ഇടവകാംഗങ്ങള്‍ ഒത്തു ചേര്‍ന്ന് മിഷന്‍ ദിനം ആഘോഷിക്കുകയും ചെയ്തു .
കത്തോലിക്ക സഭയുടെ വിശ്വാസവും പ്രവര്‍ത്തനങ്ങളും സാധാരണ ആളുകളുടെയും പ്രത്യേകിച്ചു കുട്ടികളുടെ ഇടയില്‍ വളര്‍ത്തുവാനും അതുവഴി കത്തോലിക്ക സഭയുടെ മിഷനറി പ്രവര്‍ത്തനങ്ങളില്‍ ഭഗവത്താകുക എന്ന ഉദ്ദേശവുമായി 1947ല്‍ ആരംഭിച്ച ഒരു കത്തോലിക്ക അല്‍മായ സംഘടന ആണ് ചെറുപുഷ്പ മിഷന്‍ ലീഗ് . ഇന്ന് ഈ സംഘടന ലോകത്തിന്റെ പല ഭാഗങ്ങളിലായി നിലകൊള്ളുന്നുണ്ട് .18- ആം നൂറ്റാണ്ടില്‍ ഫ്രാന്‍സിലെ ലിസിയൂസ്- ഇല്‍ ജീവിച്ച വിശുദ്ധ കൊച്ചു ത്രേസ്യ ആണ് ഈ സംഘടനയുടെ പ്രധാന പേട്രണ്‍. ഇത് കൂടാതെ വിശുദ്ധ തോമാശ്ലീഹാ , ഫ്രാന്‍സിസ് സേവ്യര്‍ , അല്‍ഫോന്‍സാമ്മ എന്നിവരും ഈ സംഘടനയുടെ പ്രധാന വിശുദ്ധര്‍ ആണ് .
ആഘോഷത്തിന്റെ ഭാഗമായി വേദപാഠ കുട്ടികളുടെയും മാതാപിതാക്കളുടെയും നേതൃത്വത്തില്‍ ഫുഡ് ഫെസ്റ്റും അതോടൊപ്പം കുട്ടികള്‍ക്കായി പലവിധ ഗെയിംസും നടത്തപ്പെട്ടു. സംഘടന ഡയറക്ടര്‍ ആയ ഇടവക വികാരി ഫാ . ജെമി പുതുശ്ശേരില്‍ , ജോയിന്റ് ഡയറക്ടര്‍ അനു വേലികെട്ടല്‍ , കോര്‍ഡിനേറ്റര്‍മാരായ ശീതള്‍ മരവെട്ടിക്കൂട്ടത്തില്‍ , റോബിന്‍ ഇലഞ്ഞിക്കല്‍ എന്നിവരാണ് ഈ ആഘോഷത്തിന് നേതൃത്വം നല്‍കിയത് .
Amol Abraham Cherukara(PRO)
