കിടങ്ങൂര്‍ :എല്‍. എല്‍. എം. ആശുപത്രിയില്‍ കിടങ്ങൂര്‍ സ്വദേശിക്ക് വിജയകരമായ റോബോട്ടിക് ശസ്ത്രക്രിയ പൂര്‍ത്തിയായി. എല്‍. എല്‍. എം. ഓര്‍ത്തോപീഡിക് വിഭാഗത്തിന് കീഴില്‍ നടന്ന ഈ ശസ്ത്രക്രിയ കോട്ടയം ജില്ലയിലെ തന്നെ ആദ്യത്തെ റോബോട്ടിക് മുട്ടു മാറ്റിവയ്ക്കല്‍ ശസ്ത്രക്രിയയാണ്. റോബോട്ടിക് സര്‍ജറി സങ്കീര്‍ണ്ണ ശസ്ത്രക്രിയകളിലെ കൃത്യത വര്‍ധിപ്പിക്കുകയും രോഗികളുടെ പുനരാരോഗ്യത്തിന് സഹായിക്കുകയും ചെയ്യുന്നു. ചെറിയ മുറിവുകള്‍ വഴിയുള്ള ശസ്ത്രക്രിയായതിനാല്‍ രക്തനഷ്ടം, വേദന, അണുബാധ എന്നിവ കുറയ്ക്കുന്നതിനൊപ്പം ആശുപത്രിവാസ കാലവും ചുരുക്കുന്നു. കൊറിയന്‍ നിര്‍മ്മിത ‘ക്യുവിസ്’ റോബോട്ട് ഉപയോഗിച്ചാണ് ഈ ശസ്ത്രക്രിയ പൂര്‍ത്തിയാക്കിയത്.
ഓര്‍ത്തോപീഡിക് വിഭാഗത്തിലെ സീനിയര്‍ കണ്‍സള്‍ട്ടന്റ് ഓര്‍ത്തോപീഡിക് സര്‍ജന്‍ ഡോ. ജിജോ ജോസിന്റെ നേതൃത്വത്തില്‍ നടന്ന ശസ്ത്രക്രിയയില്‍ ഡോ. നവനീത്.എസ്, ഡോ. അഖില്‍ ഒ. എന്‍, ഡോ. ഇജാസ് സിദ്ധിക്ക്, എന്നിവരും ഒപ്പമുണ്ടായിരുന്നു. കൂടാതെ സ്റ്റാഫ് നഴ്‌സുമാരായ ജോഫി ജോസ്, ജയലക്ഷ്മി, അനൂപ കെ. ജോര്‍ജ്, ടെക്നിഷ്യന്മാരായ സിബിന്‍ ജോണ്‍സന്‍, വിവേക് എന്നിവരും ഒപ്പമുണ്ടായിരുന്നു. ആശുപത്രി ഡയറക്ടര്‍ സിസ്റ്റര്‍ സുനിത എസ്. വി. എം. , ജോയിന്റ് ഡയറക്ടര്‍ സിസ്റ്റര്‍ അനിജ എസ്. വി. എം., മെഡിക്കല്‍ സൂപ്രണ്ട് സിസ്റ്റര്‍ ലത എസ്. വി. എം., ഓ ടി ഇന്‍ചാര്‍ജ് സിസ്റ്റര്‍ സെലിന്‍ എസ്. വി. എം., ഓപ്പറേഷന്‍ മാനേജര്‍ ലിബിന്‍ എബ്രഹാം എന്നിവര്‍ ഈ നേട്ടത്തില്‍ അഭിനന്ദനം അറിയിച്ചു.
എല്‍. എല്‍. എം. ആശുപത്രിക്ക് ഇത് വളരെ വലിയ നേട്ടമാണെന്നും റോബോട്ടിക് ശസ്ത്രക്രിയയിലൂടെ രോഗികള്‍ക്ക് കൂടുതല്‍ മികച്ച ചികിത്സ നല്‍കാന്‍ കഴിയുമെന്നും ആശുപത്രി ഡയറക്ടര്‍ സിസ്റ്റര്‍ സുനിത എസ്. വി. എം. പറഞ്ഞു. ശസ്ത്രക്രിയ വിജയകരമായി പൂര്‍ത്തിയായ രോഗി ഇപ്പോള്‍ ആശുപത്രിയില്‍ സുഖംപ്രാപിച്ച് വരുന്നു.
