ഏറ്റുമാനൂര്: കോട്ടയം ജില്ലയിലെ മികച്ച മത്സ്യക്കര്ഷകനായി നീണ്ടൂര് ജെഎസ് കൃഷിഫാം മാനേജിംഗ് ഡയറക്ടര് ജോയി ചെമ്മാച്ചേലിലിനെ തെരഞ്ഞെടുത്തു. കേരള സര്ക്കാര് ഫിഷ് ഫാര്മേഴ്സ് ഡവലപ്മെന്റ് ഏജന്സിവഴി നടപ്പിലാക്കിയ മത്സ്യകേരളം പദ്ധതിയുടെ ഭാഗമായ മത്സ്യക്കര്ഷകരില്നിന്നാണ് മികച്ച മത്സ്യക്കര്ഷകനെ തെരഞ്ഞെടുത്തത്. വര്ഷങ്ങളായി തരിശുകിടന്നിരുന്ന മണ്ണാര്മൂല പാടശേഖരത്തിലെ 28 ഏക്കര് നിലത്തില് ഒരുനെല്ലും ഒരു മീനും പദ്ധതിയുടെ ഭാഗമായാണ് പ്രവാസി മലയാളിയായ ജോയി ചെമ്മാച്ചേല് മത്സ്യക്കൃഷി നടത്തിയത്. ഫിഷ്ഫാമിലെ ആദ്യവിളവെടുപ്പ് കഴിഞ്ഞയാഴ്ചയില് ഫിഷറീസ് മന്ത്രി എസ്. ശര്മയാണ് ഉദ്ഘാടനം ചെയ്തത്. ജെയെസ് ഫാമിന്റെ മത്സ്യപ്പാടം പല ഭാഗങ്ങളായി തിരിച്ചാണ് വിവിധ ഇനം മത്സ്യങ്ങലെ വളര്ത്തുന്നത്. നാടന് മത്സ്യങ്ങളെയും, വളര്ത്തു മത്സ്യങ്ങളെയും ശാസ്തീയമായ രീതിയില് ഇവിടെ പരിരക്ഷിക്കുന്നു. പുതിയ ഇനം മത്സ്യങ്ങള്ക്കു പുറമേ അന്യമാകുന്ന കാരി, മുഷി, വരാല്, ചെമ്പല്ലി തുടങ്ങിയ നാടന് മത്സ്യങ്ങളെയും ഇവിടെ വളര്ത്തുന്നു. കട്ല, കരിമീന് എന്നിവയുടെ വന് ശേഖരം ഇവിടെയുണ്ട്. അലങ്കാര മത്സ്യങ്ങളുടെ വൈവിധ്യമാര്ന്ന ശേഖരം ഈ ഫാമിന്റെ പ്രത്യേകതയാണ്. നാളെ (ശനി) കൊച്ചിയില് അവാര്ഡ് സമ്മാനിക്കും.ഘട്ടംഘട്ടമായി വിളവെടുപ്പ് നടത്തി മിതമായ നിരക്കില് നാട്ടുകാര്ക്കുതന്നെ മത്സ്യം വിപണനം ചെയ്യാനാണ് ഉദ്ദേശിക്കുന്നതെന്നു ജോയി ചെമ്മാച്ചേല് പറഞ്ഞു.
