കോട്ടയം അതിരൂപതയ്ക്കു വേണ്ടി പൗരോഹിത്യാ ശുശ്രൂഷ നിര്വഹിക്കുവാന് എട്ടു നവവൈദികര് കൂടി. നിത്യപുരോഹിതനായ യേശുവിനെ പിന്തുടര്ന്ന് ദൈവജനത്തിന്റെ ആത്മീയ ശുശ്രൂഷയ്ക്കായി സ്വയം സമര്പ്പിച്ച നവവൈദികരെ പരിചയപ്പെടുത്തുന്നു.
ഡീക്കന് അനീഷ് (മാത്യു) കളപ്പുരയ്ക്കല് ഒ.എസ്.എച്ച്.
ചുള്ളിക്കര സെന്റ് മേരീസ് ഇടവക കളപ്പുരയ്ക്കല് തോമസ്-ഏലിയാമ്മ മകന്. രാജപുരം ഹോളിഫാമിലി ഹൈസ്കൂളില്നിന്നും സ്കൂള് വിദ്യാഭ്യാസം പൂര്ത്തിയാക്കിയശേഷം കോട്ടയം തിരുഹൃദയദാസ സമൂഹത്തില് 1998-ല് ചേര്ന്നു. വയനാട്ടിലെ സെന്റ് ജോസഫ് ബനഡിക്ടെന് ഫിലോസഫേറ്റില്നിന്നും തത്വശാസ്ത്ര പഠനവും തെള്ളകം കപ്പൂച്ചിന് വിദ്യാഭവനില്നിന്നും ദൈവശാസ്ത്ര പഠനവും പൂര്ത്തിയാക്കി. 2010 ജനുവരി രണ്ടിനു രാവിലെ 9.30-ന് ചുള്ളിക്കര സെന്റ് മേരീസ് ദേവാലയത്തില് വച്ച് കോട്ടയം അതിരൂപതാ സഹായമെത്രാന് മാര് ജോസഫ് പണ്ടാരശേരില് പിതാവിന്റെ കൈവയ്പുവഴി ശുശ്രൂഷാ പൗരോഹിത്യം സ്വീകരിച്ച് പ്രഥമ ദിവ്യബലി അര്പ്പിച്ചു.
ഡീക്കന് ലൂക്കോസ് (ഷിജോ) കുഴിപ്പിള്ളില് ഒ.എസ്.എച്ച്.
ഉഴവൂര് ഇടവക കുഴിപ്പിള്ളില് ജോര്ജ്-അന്നമ്മ ദമ്പതികളുടെ മകന്. ഉഴവൂര് സെന്റ് സ്റ്റീഫന്സ് എല്.പി. സ്കൂള്, ഒ.എല്.എല്. ഹൈസ്കൂള് എന്നിവിടങ്ങളില് സ്കൂള് വിദ്യാഭ്യാസം പൂര്ത്തിയാക്കി. ഉഴവൂര് സെന്റ് സ്റ്റീഫന്സ് കോളേജില്നിന്ന് പ്രീഡിഗ്രിയും, വാണിജ്യശാസ്ത്രത്തില് ബിരുദവും നേടി. തിരുഹൃദയക്കുന്ന് മൈനര് സെമിനാരി, കിടങ്ങൂര് സ്നേഹഭവന്, മംഗലാപുരം സെന്റ് ജോസഫ് സെമിനാരി, ആലുവ മംഗലപ്പുഴ പൊന്തിഫിക്കല് സെമിനാരി എന്നിവിടങ്ങളില് സെമിനാരി പഠനവും പൂര്ത്തിയാക്കി. ഡിസംബര് 28 രാവിലെ 9.30-ന് ഉഴവൂര് സെന്റ് സ്റ്റീഫന്സ് ഫൊറോനാപള്ളിയില് മാര് മാത്യു മൂലക്കാട്ട് പിതാവിന്റെ കൈവയ്പുവഴി ശുശ്രൂഷാപൗരോഹിത്യം സ്വീകരിച്ച് പ്രഥമ ദിവ്യബലി അര്പ്പിച്ചു.
