ഉഴവൂര്‍: ഒ.എല്‍.എല്‍ ഹൈസ്‌കൂളിന്റെ നവതി ആഘോഷങ്ങളെപ്പറ്റി ആലോചിക്കുന്നതിനും, സ്‌കൂളില്‍ നടപ്പാക്കേണ്ട നവീനമായ വിദ്യഭ്യാസ പദ്ധതികളെക്കുറിച്ചും, സ്‌കൂളിന്റെ ഭൗതിക സാഹച്യര്യങ്ങള്‍ വര്‍ധിക്കിക്കേണ്ടതിനെക്കുറിച്ചും നിര്‍ദേശങ്ങള്‍ സ്വീകരിക്കുന്നതിനും പൂര്‍വ വിദ്യാര്‍ഥികളുടെയയോഗം ചേര്‍ന്നു. കേരളപ്പിറവി ദിനത്തില്‍ ചേര്‍ന്ന യോഗത്തില്‍ നൂറോളം പൂര്‍വ വിദ്യാര്‍ഥികള്‍ പങ്കെടുത്തു. സ്‌കൂള്‍ മാനേജര്‍ ഫാ.ജോര്‍ജ്‌ പുതുപ്പറമ്പില്‍ യോഗത്തില്‍ ആമുഖ സന്ദേശം നല്‍കി. പൂര്‍വ വിദ്യാര്‍ഥി സംഘടന രൂപീകരിക്കുക, വിവിധ ബാച്ചുകളുടെ സംഗമങ്ങള്‍ വിളിക്കുന്നതിന്‌ താല്‍പര്യപ്പെട്ടു വരുന്നവര്‍ക്ക്‌ സൗകര്യങ്ങല്‍ ചെയ്‌തു കൊടുക്കുക, ഇംഗ്ലിഷ്‌ വിദ്യഭ്യാസ സൗകര്യങ്ങല്‍ വര്‍ധിപ്പിക്കുക, എല്‍.പി മുതല്‍ ഹയര്‍ സെക്കന്‍ഡറി വരെയുള്ള വിദ്യാഭ്യാസ സ്ഥാപനങ്ങള്‍ ഒരു സ്ഥലത്ത്‌ ഒന്നിപ്പിക്കുക തുടങ്ങി നിരവധി നിര്‍ദേശങ്ങള്‍ ചര്‍ച്ചയില്‍ ഉയര്‍ന്നു. ഇത്തരം ആശയങ്ങല്‍ പഠിച്ച്‌ നടപ്പില്‍ വരുത്താവുന്ന കാര്യങ്ങളെക്കുറിച്ച്‌ രൂപരേഖ തയാറാക്കാന്‍ 101 അംഗ കമ്മിര്‌റിയെ തെരഞ്ഞെടുക്കുവാന്‍ തീരുമാനിച്ചു. യോഗത്തിന്‌ എത്തിയവരില്‍ നിന്ന്‌ 20 പേരെ കമ്മിറ്റിയില്‍ ഉള്‍പ്പെടുത്തി. പൂര്‍വ വിദ്യാര്‍തികളില്‍ നിന്നും പ്രഗല്‍ഭരായ നാനാജാതി മതസ്ഥരെ കമ്മിറ്റിയിലേക്കു നോമിനേറ്റു ചെയ്യുന്നതിന്‌ സ്‌കൂള്‍ മാനേജരെയോ, ഹെഡ്‌മാസ്‌റ്ററെയോ വിവരം അറിയിക്കണമെന്ന്‌ ബന്ധപ്പെട്ടവര്‍ അഭ്യര്‍ഥിച്ചു. ഓരോ രാജ്യത്തു നിന്നും 2 മുതല്‍ 5 വരെ അംഗങ്ങളെ പ്രസ്‌തുത രാജ്യത്തുള്ള പൂര്‍വ വിദ്യാര്‍ഥികളുടെ അംഗസംഖ്യക്കനുസരിച്ച്‌ കമ്മിറ്റിയില്‍ ഉള്‍പ്പെടുത്തും. വിപുലീകരിച്ച 101 അംഗ കമ്മിറ്റി ഡിസംബറില്‍ യോഗം ചേര്‍ന്ന്‌ നവതിയോടനുബന്ധിച്ചു നടപ്പാക്കാന്‍ ഉദ്ദേശിക്കുന്ന കാര്യങ്ങളെപ്പറ്റി പഠിക്കുകയും ഉചിതമായ തീരുമാനമെടുക്കുകയും ചെയ്യും.
1919 ല്‍ യു.പി സ്‌കൂളായിട്ടാണ്‌ ഒ.എല്‍.എല്‍ സ്‌കൂളിനു തുടക്കമായത്‌. ജോസഫ്‌ ചാഴികാടന്‍ എക്‌സ്‌ എം.എല്‍.എ ആയിരുന്നു പ്രഥമ ഹെഡ്‌മാസ്റ്റര്‍. മുന്‍ രാഷ്‌ട്രപതി കെ.ആര്‍.നാരായണന്‍, ബിഷപ്‌ മാര്‍ സെബാസ്റ്റ്യന്‍ വള്ളോപ്പള്ളി തുടങ്ങിയവര്‍ ഈ സ്‌കൂളിലെ പൂര്‍വ വിദ്യാര്‍ഥികളായിരുന്നു. നവതി ആഘോഷത്തെപ്പറ്റിയുള്ള പൂര്‍വ വിദ്യാര്‍ഥികളുടെ നിര്‍ദേശങ്ങളും, അഭിപ്രായങ്ങളും അറിയിക്കണമെന്ന്‌ ബന്ധപ്പെട്ടവര്‍ അറിയിച്ചു. Head Master, OLL High School, Uzhavoor. ollhsuzr@bsnl.in, 04822240108.
സ്റ്റീഫന്‍ ചെട്ടിക്കന്‍